E scheeni (Jubel-)Fasnacht 2019

10.03.2019 14:16:37 | Dominic Stöcklin | 0 Kommentare
Aine fir alli und alli fir aine
Numme so goots, wurde mir drei maine
Doorum häissts das Joor für die Grosse und Glaine
Aine fir alli und alli fir aine.

Gli schloots 4i – das isch dr Hit
Alli zämme mache mir an dr Fasnacht mit
Wenn d Kircheglocke am Mäntig 4 Mol schloot
Und in dr ganze Stadt s Liecht abgoot
Denn macht d Vorfreud dr Fasnacht Platz
Und unsere Major rieft si magische Satz

Ihr könnets uns glaube, es isch woor
Mir freue uns fescht uff unser Jubeljoor
Durch d Stadt laufe mir alli als gstifleti Kater
Verastalte drbii aber käi Theater
Sondern dien s Rolli si richtig zelebriere
Und uns im Jubeljoor vo dr beschte Site presentiere

Aber bevor s wie immer los ka go
Dien mir uff em Minschterplatz zämme ko
Denn au das Joor es isch wider e Hit
Hän mir die schönschte Ladäärne wo s z Basel git.
Dr Dangg vo uns Junge - wie könnt s au anderst sii
Goot an Sämi – schön bisch bi dr Junge Garde als Künschtler drbii.

Mir vom Stamm hän Dangg em Däni e scheeni Jubel-Ladäärne bikoo
Und dien uns drei Daag vo däm Katze-Buusi verzaubere loo.
Und Dangg dr Mimi laufe mir das Joor alli in voller Pracht
Als gstifleti Kater dur Basel – vom Morge bis tief in d Nacht.

Bi dr alte Garde isch s Zepter witer gä worde
Neu duet dr Gabriel für d Ladäärne soorge
Au är het sich überlegt was me ka mache
Us me Jubel-Sujet, do gits nid numme z lache
Und findet s „Zämme“ das isch wichtig
Denn numme so goots in die richtig Richtig.

Wenn Zit hesch und dr Zeedel duesch sichte
No wäisch, vom zämme dien mir au dört brichte.
Denn Zämme stämme mir hyte Feschter
Lämpe zwischen ander isch Schnee vo geschter
An dr Fasnacht zämme e Umgängli mache
Zämme löön mirs so richtig krache
Das ainte glaine Wort isch wichtig
Denn numme zämme isch es richtig
E so hän mir 50 Joor iberläbbt
Und dodrmit au bitz Basel prägt.

Mit dääne Wort dien mir die Reed beände
Und uns zämme dr Fasnacht zuewände
Mir wünsche doorum jetzt allne Rolli
Drei scheeni Däääg! Und e Fasnacht, e tolli!
Keine Kommentare vorhanden.