Fasnacht 2018 - dr Zeedel

18.02.2018 12:14:49 | Dominic Stöcklin | 0 Kommentare
Sunntigoobe, nach de 5i, uff em Münschterplatz.
Es goot nimmi lang und du hörsch dä magisch Satz.
Morgesträich, Vorwärts, Marsch – häissts au das Joor.
Denn das sin die 3 magische Wörter vo unserem Major.
Spötischtens denn wüsse mir alli: Jetzt ischs Zit.
D Fasnacht fangt ändlig a – es isch so wit.

Aber bevors ka losgoo – es isch e so.
Dien mir am Sunntig uff däm Platz zämme ko.
Zum e Bligg uff d Ladäärne wärfe – jetzt hesch d Gläägehäit!
Denn drei so tolli Wärk sin käi Sälbstverständligkäit.
Doorum dien mir unsere Künschtler Dangge saage
Und die Ladäärne voller Stolz durch Basel traage.

Luegsch d Ladäärne a, merggsch d Wält isch nid im Lot.
Wenn mir so witer mache, kunnt d Gsellschaft in Not.
Die Alt Garde mäint: D Wält isch nääbe de Schueh.
Und het vo dääre Entwigglig langsam gnue.
Käi äifachs Sujet, doorum tue ich euch ebbis drzue verzelle.
Me findet im Zeedel die folgende Stelle:

Voll näbe de Schue,
Vili bringt das gar nid uss dr Rueh.
Me läbt als Egoischt vor sich ane,
Jede isch sich dr Näggschti nundefahne.
Uss dämm ich Mensch kunsch nimmi ewägg,
alli kümmerets e fiechte Drägg.
So wit simmer zämme ko,
das soll ain verstoh.

Dr Stammverein nimmt das Joor dä Ball uff
Und setzt mit em Sujet no äine druff.
So dräit sich im Zeedel  alles – es isch woor -
Um e Egoismus als gröschti Gfoor.
 
Jetzt stell dir vor, die Entwigglig nimmt ihre Lauf,
E jeede nimmt für si Ego Äinsamkeit in Kauf,
Nid linggs, nid rächts – numme ICH,
Beziehigsunfähig – aber das isch jo glich.
Es entwiggled sich e Volk vo Egoide,
Wo unter akkutem Egoismus duet liide.
Perfäggt, duuregstylt für viil Gäld,
Ddas isch dr Untergang vo dääre Wält!

Dass dr Fokus uff s „Ich“ nid immer kritisch isch
Merggsch wenn bi de Junge Rolli bisch.
Bisch e Marke worde – no isch das hüt richtig.
Denn bekannt si und gliebt wärde, das isch wichtig.
 
Es isch esoo: Du wottsch woorgnoo wärde
Vo alle Fans uff dr ganze Äärde.
Denn gits zum Gäld bikoo e Möögligkäit,
Will e jeede Fan diini Sache dräit.
Ob Bulli, Thiischi, Schaal oder Kappe:
Hesch Mörtsch, duets mit dr Karriere klappe.
Woorgnoo wärde, das isch verruggt wichtig,
Drnoo gits für di numme äi Richtig.

Doodrmit isch unseri Zit do Oobe vrbii.
D Fasnacht fangt a – und zwar scho gli.
Und zwoor alli zääme!
– jetzt zellt nid s „ICH“.
Ob bi de Junge, Alte oder im Stamm  – das isch glich.
Denn zämme Fasnacht mache isch unseri Liideschaft.
Und das goot numme als Gmäinschaft!
Doorum wünsche mir jetzt allne Rolli
Drei scheeni Dääg! Und e Fasnacht, e tolli!
Keine Kommentare vorhanden.