Alti Garde, Juubel Gala Oobe, 11.11.2023

Scho d’Ylaadig zem Juubel Gala Fescht uff dr‘
11.11./16.11h het viil versproche und ebeso ghalte.
Was do alles an Superlative uf is zuekho isch, kha me
nid yberträffe.

Aagfange hets punggt 16.11h mit eme tolle Apéro und
dr Begriessig vom Conferencier Martin Stich. Au
unsere Obmaa, dr Gilbi, het e baar nätti
Begriessigswort an BRAG Feschtfamilie grichtet und
zueglych e Ruggbligg ufs 25 jährige Jubeljoohr gäh.
Ebeso het är alli Feschtbsuecher härzlig willkomme
gheisse und uns allne e schöne, gmietlige und
unvergässlige Oobe gwunsche. Druffaabe het sich
denn dr Martin nimm könne zrugghalte und het dr
Aafang yglüdde und e Maa akündet, wo diräggt us
Köln aagreist isch. Was het denn e Schwoob an
unserem Juubel-Fescht verlore? Klar, jetz foht
s’Hirnlämbbli afoh blingge, denn vo wittem het me
scho dr carnevalesich Schlachtruef „s’dädäredä,
dädäredä“ kenne höre. E Büdderedner, aagfiehrt vo
drei Jecke, mit de sogenannte, laider aber
unsichtbaare Narrekabbene, wo uss voller Kehle und
unter grossem Glächter vo dr adrätt aazogene
Feschtgmainschaft, luthals „mittdederälelet“, resp.
mitgschraue het. Die Drei hän d’Uffgoob bikho, noch
jedem Värs ihr Tää Tää Tää Tää, wo gwöhnligerwiis
inere dütsche Carnevalssitzig praktiziert wird,
uusezschreie, was si aber meh schlächt als rächt
aanebrocht hän. Isch das emänd an dr mangelnde
Unwüssehait, oder sogar am scho konsumierte Bier,
wo bekannterwys uff d’Konzentration schloot, glääge?
Me weiss es nit so gnau!

Druff aabe isch s’Vorspiis-Buffet uffgfahre worde.
Usgsuechti Häbbli, wie Antipaschti mit Basilikum,
Pesto, e Noorwägischi Fischpladde, Rindscarpaccio,
Saisonsalat in vier Variatione, wie z.B. Tomate
Mozzarella, mediteraner Meeresfruchtsalat, Bulgur
etc. etc. So isch scho emol unsere Gaume für dr
Hauptgang kitzelet worde, „Härz, was begehrsch“.
Komplimänt an d’Saffre-Kuchi. Zwyscheiine het me
denn Zyt kha, sich mit luschtige und interessante
Gsprööch am Tisch z‘unterhalte, oder me het sich
zemene Bsiechli an e andere Tisch gsetzt. Doch nit
z’vergässe: dr Schlugg Wy, oder was au immer, hän nit
derfe fähle. Widder im Täggscht. S‘Gmurmel im Saal
isch pletzlig verstummt. Trompetekläng hän dr Saal
erfüllt – aber ganz klar, nit vonere Gugge -, und e jede
Rolli het schnäll wiider uf sim Stuehl Platz gnoh. E ganz
grossi Yberraschig het uf is gwartet. D’Spannig, isch
riise gross gsi und me hät fascht s’beriehmti Nödeli uff
e Boode falle höre. Und wenn i nit scho gsässe wär,
denn hätts mi jetzt uff dr „Arsch“ gsetzt. Bi gfläsht gsi.
Grossartig, d’Improvisante sin vor is gstande. Tosende
Rolli-Applaus. Die bekannti Gruppierig, us 9 Maa
bestehend, hän is in d‘Kläng vo dr Jazz-Muusig und in
alte Blues entfiehrt. Dr absoluti Wahnsinn. Mega. Mir
sin alli wie us em Hiisli gsi. D‘Stimmig im Saal het scho
fascht brodlet. Sie hän nit nur dr Saal zem beebe
brocht, au mir hän is, wie me so schön sait, fascht
nimm kennt. Aifach nur grandios. I bikumm grad wider
Hienerhut, wenn i nur scho dra dängg. Doch laider het
au s’Schöne, s’Emotionale emol e Aend, grrrrrr. Doch,
juhee, mir dörfen is spöter nomol uf e Tranche Jazz
freue.

Jetzt isch aber dr Maage wider emol an d’Raihe kho.
S‘Personal het jedem Gascht e fein Aesse serviert. E
rosa brotenes Roastbeef, Härdepfelgratin und Gmies
hän uff em Täller noch Vernichtig gschraue. Mit volle
Büüch sin mir für widderi Yberraschige barat
gschtande und hän gschpannt uff widderi Attraggtione
gwartet.

E scheen klaidete Comité-Maa, dr Robi Schärz, het
denn unserem Obmaa Gilbi unter grossem Jubel
d’Gratulationsurkunde vom Comité zem 25.
Juubeljoohr ybergäh. E Momänt, wo nit alli, wo in
Basel mit eme Costym und emene Gsicht Fasnacht
mache, könne nochvollzieh, was das für e Clique
bedytet. Nur e renomierti Clique, wie zem Bispiil
d’Basler Rolli, Alti Garde, kunnt zue sonere ehrevolle
Uszeichnig. Mir dörfe uff die vergangene 25 BRAG
Jööhrli Stolz si. Au ich, als Rolli Uurgestai, dörf mi jetzt
zue däre illuschtre Gsellschaft zelle.

Dr Gilbi het druffaabe „sini“ Urkunde mit gschwellter
Bruscht im Saal ummezeigt und e Jedem, wo das
wärtvoll, grahmte Unikat het welle beguetachte, unter
d’Nase ghebt und isch derbi us luter Freud und Stolz
fascht yber sini aigene Fiess gschtolperet. Nochere
glaine Pause isch‘s im Saal wider e weneli ruehiger
worde, denn ….. judihuiiii, d’Improvisante sin wider uf
em Programm gschtande. E wohre Gnuss und kai
einzige Rolli isch am Stuehl klääbe bliibe. Zue däne
wunderbare Kläng isch tanzt, mitgsunge, klatscht,
gjoohlt und luthals pfiffe worde. D’Rolli hän alles gäh.
Dr Saal het kocht. Doch laider hän mir die unsagbar
tolle Improvisante noch ere gfühlte kurze Zyt und e
baar Zuegoobe miesse zieh loh. Mit tosendem Rolli-
Applaus hän mir si verabschiidet.

S’Programm isch widder gloffe, denn scho wiider hän
unseri Gaume g‘frohloggt und me het sich gluschtig
ybers s’Dessert-Buffet här gmacht. Beschtüggt mit
aller gattig Siessem, aber au mit verschiedenem Käs –
mir sin jo schliesslig e „Käs- und Schoggi-Land“ - hän
denn aber d‘Köschtligkaite nohdisno abgnoh und
unseri Büüch zuegnoh! Gsamthaft derf me saage,
d’Saffre-Kuchi het e Maischterlaischtig vollbrocht - nit
eso wie dr FCB, wo laider kaini Maischterlaischtige me
aane bringt!

Unser Fescht isch aber noni fertig gsi, nai, im Gegedail.
Jetzt ischs Tanzbai zem Ysatz kho. Dr „Human Jukebox
Maa“, alias Michael Wäckerlin, het d’Rolli uff s’Parkett
gloggt. Mit emene Unkoschtebytrag vo jewiils 2 oder 5
Frangge pro Song, wo jedem Rolli zer Verfiegig
gschtande isch, het me e Wunschsong us eme
Repertoire vo über 200 Songs us Pop, Romantic,
Rock’n’Roll, Soul, Reggae, Rap, Hip Hop, Jazz, Schlager,
Rock, Country oder Klassik könne uswähle. D’Lischte
vo divärse Songs isch lang, resp. sehr lang gsi. Gwunne
het denn jewils s‘zoogene s‘Löösli mit em notierte
Song wo denn dr Michael mit Unterstützig vo sinere
Jukebox, zem Beschte brocht het. E cooli Sach, wo bi
de Rolli ygschlaage het. Es isch tanzt worde bis
d’Schweissperle aabetropft sin, Polonaise sin
gschtartet worde und sogar e rosaroti Plastic-Gitarre,
wo sich dr Gilbi sofort untere Nagel grisse und gekonnt
dur d‘Saalluft gschwunge het, isch zem Ysatz kho. Mit
däm pinkfarbige Ebbis het är - dr Wält entruggt -, aber
immer im Taggt, die gröschte Hits virtuell uffs Parkett
gleggt. Unsere liebe Obmaa isch yber sich sälber
uusegwaggse. Wenn‘s nit zem Gröhle gsi wär, denn
aber ganz sicher zem Gixe. Hollywood hät sich
beschtimmt d’Finger noch ihm gschläggt.

Laider het au dä Programmdail si Aend gfunde. Mit em
Song: „Eine neue Liebe ist wie ein neues Leben, na na
na na na naa, ….“ due ich jetzt mi Bricht vom BRAG
Juubel Gala Oobe abschliesse und zitier dr Jürgen
Marcus: „ … vorbei und vergessen und zählt nicht
mehr …“. Doch „vergässe“ wärde mir dä Oobe sicher
nit eso schnäll, aber laider isch die gfühlti Herrligkait
jetz „vorbei“.

Ich dörf und muess em Emme und em Andy e riisig
Kränzli winde und sag im Namme vo uns alle e härzlig

DANGGSCHEEN. Es isch grossartig gsi.

D‘neu Altgardischtin Therese