Jubel Fescht

08.01.2020 17:54:58 | Dominic Stöcklin | 0 Kommentare
Ändlig isch es sowyt, dr letschti Höhepunkt vom Jubeljohr stoht bevor. Me seht’s scho an de langsam voll wärdende Büss und Tram, wo in Richtig Allschwil fahre. Immer meh bekannti Gsichter seht me und immer schwarz/wysser wärde d’Masse, wo schynbar alli s’glyche Ziel, s’ Zic Zac in Allschwil, hänn. 

Obwohl erwartigsfroh, e bitz friehner unterwägs, erwarte eim scho ganz vyl Rollis in Festgoschdym, in flippiger Kleidig, jede grad wie n’er Luscht het. Eifach schwarz/wyss isch wichtig, e glungeni Idee vom Ok, nid die letschti!

Näbem e erste Cüpli, Bier oder für die Jüngere e Coki (oder wenn’s muess si au eme Mineral) begrüesst me links und rächts jungi und jung blybeni Rollis. Zauberhaft d Phantasie vo de Goschdyms, zauberhaft au die kleine Privatvorstellige vom Magier Jovi, wo uns dur e Obe begleitet.

Sälbstverständlig dörf au e Ständeli nid fähle, s’wird uns vo unserer «Muetter», vo dere sich d Rolli vor 50 Johr abglöst hänn, d Reveränz erwyse. Si ka sich sälber dervo überzüge, dass es dr «Tochter» au mit 50 Johr Sälbständigkeit uff em Buggel, glänzend goht. Nach ere kurze, luunige Asproch mit Presäntübergob an unsere Preesi und ere glungene Replik durch unsere Dominic widme sich alli, Wettstai, Rolli, gross und klei wieder emene ussgiebige Apéro. 

Uff sanfti Ufforderig durch d’Tätschmeister vom Obe mit Ghilfe und Ghilfinne, macht me sich langsam uff ins Inneri vom Zic Zac, wo nach kurzer Zyt s’Jubel-OK verträte dur d Ursi und dr Rico dr Obe eröffne. Sy dörfe hütt e exakt 200-köpfigi Rolli-Familie begriesse und dur dr Obe fiehre.

Als erste Höhepunkt kündigt sich grad dr Ufftritt vo der Junge Garde a. Si zeigt, dass me sich weder bezüglich Originalität no Musikalität vor dr Zuekunft fürchte muess. Au d JG isch perfäkt in schwarz/wyss kleidet. Si mache e tolli Retraite, wo alli - au die kleinste - scho mit vyl Ysatz öbbis bytrage könne. Sigs uff dr Bühni oder uff dr Galerie, es isch mit vyl Inbrunst pfyffe, drummlet, klatscht oder gsunge worde. Für dr 50. Geburtsdaag vo de Rolli spiile si no e «Happy Birthday» uf em Kazoo. (Geburtsdaag hän nit nur d Rolli gfiirt, sondern au d Jasmin vo dr JG. Zum Abschluss drum grad nomol s «Happy Birthday», aber diesmol gsunge.). E grandiose Ufftritt, Bravo! 

Nach kurzer Asproche vom OK-Preesi, em Rico und em Preesi Dominic, isch dr Startschuss zum erste Gang am Büffet gfalle. Dass es nid zur Schlacht am kalte Büffet worde isch, isch der gschyde Organisation z’verdanke gsi, wo nid nur ei Büffet bereit gmacht hett. Kuhm sin die letschte Salatblätter verschlunge gsi, isch s’Programm wyter gange.

Als näggschts hett dr Magier Jovi si grosse Ufftritt, wo er vor allem die jüngere unter uns in Bann zieht und durch sini erstunlige Tricks begeisteret. Zum Glück hett er nid dr Hauptgang verschwinde loh, das wär nämlig schad gsi, wenn s’warme Büffet uff eimol wägzauberet gsi wär.

Nach em Hauptgang isch es denn erscht richtig losgange. Unser Rolli-Jodler-Chörli hett d Bühni gstürmt, zerscht hett’s für uns zwor gheisse «Loose!» bevor mir alli denn au hänn dörfe «Singe» ... s Chörli hett in vyle Iiebigsstunde dr Ohrwurm «Ewigi Liebi» e bitzeli frei interpretiert und perfekt ystudiert, so dass mer bim Refrain alli hänn könne mitsinge:

Mir findes super, findes mega cool

zem Fasnacht zämme mache

mir tanggen ys jede Donschtig uf, 

wils eifach so guet tuet


mir hän ys gärn, mir bruchen ys

jä mir sin süchtig nochenand 

doch Garantie könne mer e keini gäh

dass es für immer eso wird sy


ewigi Rolli, das wünsch ich dir

Ewigi Rolli das wünsch ich mir



Fasnacht für immer, für d Ewigkeit

mir gän alles uf für di

s Pfyffe het yygschlage in mi Härz

s Drummle hets zem Brenne brocht


troffe vo däm Stromstoss, wo so guet tuet

wämer alles mache, alles gäh

für d Fasnacht alles tue

sy looht ys nümme loos


ewigi Rolli, das wünsch ich dir

ewigi Rolli das wünsch ich mir

ewigi Rolli, au für die dehei

ewigi Rolli, und du bisch nie elei


ewigi Rolli, das wünsch ich dir

ewigi Rolli das wünsch ich mir

ewigi Rolli, für gross und glai

ewigi Rolli, und du bisch nie dehei


Nach em Dessertbuffet hett denn dr Magier Jovi nomol Glägeheit gha, Jung und Alt mit sine Zaubertricks in Bann z’zieh, was em au glunge isch. Mit grossem Applaus hett me ihn verabschiedet.

Langsam isch es jetzt gege Mitternacht gange und dr DJ hett s Zepter übernoh. Nur zaghaft isch allerdings d’Tanzbühni g’enteret worde. Zerscht hett sich vor allem die Jungi Garde usstobt, bis sich denn d Bühni doch no noch und noch gfüllt hett und vor allem bim Evergreen «Ewigi Rolli» (wo jo jetzt alli perfekt usswändig hänn könne) d Post abgange isch.

E Attraktion, wo Jung und Alt dr ganz Obe in Bann zoge hett, isch dr Photi-Buzzer gsi, wo me sich hett könne fotografiere loh, d Schlange isch no länger gsi als an de Büffets! Nid nur die Junge hänn Spass gha, sich in unterschiedliche Konstellatione abbilde z loh. E glungeni Idee und e Super-Erinnerig an das grandiose Fest!

Bi fätziger Musig, e baar guete Drinks und etliche Schlummerbächer hett sich denn au das Fescht leider em Ändi zuegneigt. Es isch zwar e Ytrittskontrolle gfiehrt worde, aber uff d’Ustrittskontrolle hett me zum Glück verzichtet.

E härzlige Dank an alli, speziell em Jubel-OK, wo das Fest organisiert und ermöglicht hänn, es isch wie ‘s ganze Jubeljohr e unvergässlichs Erläbnis gsi.
Keine Kommentare vorhanden.